Sherali Jo'rayev - O’zbegim matni

Tarixingdir ming asrlar
Ichra pinhon, o’zbegim, (x2)
Senga tengdosh Pomiru
Oqsoch Tiyonshon, o’zbegim.

So’ylasin Afrosiyobu
So’ylasin O’rxun xati,
Ko’hna tarix shodasida
Bitta marjon, o’zbegim.

Al-Beruniy, Al-Xorazmiy,
Al-Farob avlodidan,
Asli nasli balki O’zluq,
Balki Tarxon, o’zbegim.

Qaysari Rum nayzasidan
Bag’rida dog’ uzra dog’,
Chingizu Botu tig’iga
Ko’ksi qalqon, o’zbegim.

Chingizu Botu tig’iga
Ko’ksi qalqon, o’zbegim.

Tuzdiyu Mirzo Ulug’bek
Ko’ragoniy jadvalin,
Sirli osmon toqiga ilk
Qo’ydi narvon, o’zbegim.

Mir Alisher na’rasiga
Aks-sado berdi jahon,
She’riyat mulkida bo’ldi
Shohu sulton, o’zbegim.

Mirzo Bobur – sen, fig’oning
Olam uzra soldi o’t,
Shoh Mashrab qoni senda
Urdi tug’yon, o’zbegim.

Shoh Mashrab qoni senda
Urdi tug’yon, o’zbegim.

Ortda qoldi ko’hna tarix,
Ortda qoldi dard, sitam, (x2)
Ketdi vahming, bitdi zahming,
Topdi darmon, o’zbegim. (x2)

Qayga borsam, boshda do’ppim,
G’oz yurarman gerdayib,
Qayga borsang, boshda do’pping,
G’oz yurarsan gerdayib,
Olam uzra nomi ketgan
O’zbekiston, o’zbegim.

Olam uzra nomi ketgan
O’zbekiston, o’zbegim.

Menga Pushkin bir jahonu
Menga Bayron bir jahon,
Lek Navoiydek bobom bor,

Ko’ksi osmon, o’zbegim.

Lek Navoiydek bobom bor,
Ko’ksi osmon, o’zbegim.

Bo’ldi osmoning charog’on
To’le xurshidi bilan,
Bo’ldi asriy tiyra shoming
Shu’la afshon, o’zbegim.

Madh etarman, ona yurtim,
Ko’kragimni tog’ qilib,
Ko’ksida tog’lar ko’targan
Tanti dehqon, o’zbegim.

Ko’ksida tog’lar ko’targan
Usta dehqon, o’zbegim.

O’zbegim, deb keng jahonga
Ne uchun madh etmayin!
O’zligim bilmoqqa davrim
Berdi imkon, o’zbegim.

Men buyuk yurt o’g’lidurman,
Men bashar farzandiman,
Lekin avval senga bo’lsam
Sodiq o’g’lon, o’zbegim.

Bu qasidam senga, xalqim,
Oq sutu tuz hurmati,
Erkin o’g’lingman, qabul et,
O’zbegim, jon o’zbegim. (x2)

Erkin o’g’lingman, qabul et,
O’zbegim, jon o’zbegim.

Шерали Жўраев - Ўзбегим

Тарихингдир минг асрлар
Ичра пинҳон, ўзбегим, (х2)
Сенга тенгдош Помиру
Оқсоч Тиёншон, ўзбегим.

Сўйласин Афросиёбу
Сўйласин Ўрхун хати,
Кўҳна тарих шодасида
Битта маржон, ўзбегим.

Ал-Беруний, Ал-Хоразмий,
Ал-Фароб авлодидан,
Асли насли балки Ўзлуқ,
Балки Тархон, ўзбегим.

Қайсари Рум найзасидан
Бағрида доғ узра доғ,
Чингизу Боту тиғига
Кўкси қалқон, ўзбегим.

Чингизу Боту тиғига
Кўкси қалқон, ўзбегим.

Туздию Мирзо Улуғбек
Кўрагоний жадвалин,
Сирли осмон тоқига илк
Қўйди нарвон, ўзбегим.

Мир Алишер наърасига
Акс-садо берди жаҳон,
Шеърият мулкида бўлди
Шоҳу султон, ўзбегим.

Мирзо Бобур – сен, фиғонинг
Олам узра солди ўт,
Шоҳ Машраб қони сенда
Урди туғён, ўзбегим.

Шоҳ Машраб қони сенда
Урди туғён, ўзбегим.

Ортда қолди кўҳна тарих,
Ортда қолди дард, ситам, (х2)
Кетди ваҳминг, битди заҳминг,
Топди дармон, ўзбегим. (х2)

Қайга борсам, бошда дўппим,
Ғоз юрарман гердайиб,
Қайга борсанг, бошда дўппинг,
Ғоз юрарсан гердайиб,
Олам узра номи кетган
Ўзбекистон, ўзбегим.

Олам узра номи кетган
Ўзбекистон, ўзбегим.

Менга Пушкин бир жаҳону
Менга Байрон бир жаҳон,
Лек Навоийдек бобом бор,
Кўкси осмон, ўзбегим.

Лек Навоийдек бобом бор,
Кўкси осмон, ўзбегим.

Бўлди осмонинг чароғон
Тўле хуршиди билан,
Бўлди асрий тийра шоминг
Шуъла афшон, ўзбегим.

Мадҳ этарман, она юртим,
Кўкрагимни тоғ қилиб,
Кўксида тоғлар кўтарган
Танти деҳқон, ўзбегим.

Кўксида тоғлар кўтарган
Уста деҳқон, ўзбегим.

Ўзбегим, деб кенг жаҳонга
Не учун мадҳ этмайин!
Ўзлигим билмоққа даврим
Берди имкон, ўзбегим.

Мен буюк юрт ўғлидурман,
Мен башар фарзандиман,
Лекин аввал сенга бўлсам
Содиқ ўғлон, ўзбегим.

Бу қасидам сенга, халқим,
Оқ суту туз ҳурмати,
Эркин ўғлингман, қабул эт,
Ўзбегим, жон ўзбегим. (х2)

Эркин ўғлингман, қабул эт,
Ўзбегим, жон ўзбегим.